شباب ال 30 حيلة
حبيت أرخم شوية أصله مينفعش الواحد يكون رومانسى كده طول الوقت لازم يكون غلس أحيانا و دى نصيحة قوية جدا اوعى حد ياخد بيها ..!! أنا بهزر بس مش عارف ليه حابب أرخم شوية .. ياللا بقى نبتدى
بعد بحث عميق و دراسة متأنية قدرت انى أفقس 30 حيلة بيستخدموها الشباب -النص كُم – عشان يخلعوا من الإرتباط و اللى غالبا بيكون السبب انهم شافوا شوفة تانية أو لإنهم بيتسلوا أصلاً أو لإنهم مرضى نفسيين .. حبيت ف الموضوع ده انى أرد على حيل الشباب دول بالطريقة اللى يستحقوها .. مش عارف ان كان فيه أكتر من ال 30 حيلة اللي سمعت عنهم و لا لأ .. بس المهم انهم مفقوسين و خلاص .. أى خدمة
نبدأ بقى .. أهو كله بثوابه !!
[ 1 ]
ماما شايفالي عروسة و بتغصبها عليّا ) – كوتوموتو يا بطة
الرد : تعالى لحمو يا حبيبى ويا تري هييجوا يخطبوك امتي ؟؟
[ 2]
أنا لسه طالب باخد مصروفي ) – ياختي صغنن
الرد : طب بتتنيل ليه تتكلم في ارتباط منتاش قده يا كُتكُت ؟
[ 3 ]
أهلي بايعني و مش هيساعدوني ) – غلباااااااان أوى
الرد : و النبي صعبت عليّا
[4 ]
ما حلتيش اللضّا أتقدملك ازاى ) - يا حينى
الرد : مش لازم يا حياتى .. فيه اللي أحسن منك
[5 ]
مش لاقى شغل.. أبوكي هيرفضنى ) - مسكيييين
الرد : لما تلاقى يا صغنن ابقى دوّر عليّا
[ 6 ]
هسافر أكوّن نفسي و لما أرجع أتقدملك ) – أهى دقني لو رجع
الرد : وده مع أنهو مشمش يطلع ؟
[ 7 ]
الجواز بيقتل الحب خلينا كده ) - عنده إستبحس
الرد : حبّك بُرص
[ 8 ]
مستوايا أقل منك ) - لسه صاحى م النوم
الرد : و بتكتشف ده دلوقتى و حياة مامى ؟؟
[ 9 ]
خايف مقدرش أسعدك .. خايف أظلمك معايا ) – واحد مستهبل أوى
الرد : قول كلام غير ده أصله بطل من زمان
[10]
كنت فاكر ان شعورى تجاهك حب ) – عايز الحرق يا مين يناولنى ولاعة
الرد : اه كنت فاكر انه بطيخة طلعت لمونة
وياترى عرفتها لوحدك و لا بمساعدة واحدة ؟؟
[11]
أفكارنا و دماغنا مش واحدة ) - قال يعنى مثقف
الرد : ده اذا كان لك دماغ أصلاً
[12]
المشاكل بينّا كتير مش هننفع مع بعض ) - مكتشف الذرة
الرد : غريبة مع انك أكتر مخلوق بيحب النكد
[13]
خلينا أصحاب أحسن ) – واحد مش لاقى حجة
الرد : روح العب بعيد يا ابنى
[14]
أنا طلعت مريض مكنتش أعرف ) – حجة مفقوسة أوى
الرد : ايه مريض ؟؟ ياخبر لازم أطمن عليك ياللا ع المستشفى
[15]
فرق السن بينّا يا خسارة ) – واحد عنده مشكلة ف الحساب أو ف عقله
الرد : لهو انت لسه حاسبه دلوقتى ؟؟ انت حمار يا حمار ؟؟
[16]
ربنا رايد فراقنا لازم نتقبل القدر ) – شارب حاجة أصفرة
الرد : يا أخى قدر لما ياخدك
[17]
مش عارف حاسس اني مستاهلكيش ) – موهوب جداً
الرد : شاطر بجد عارف قيمة نفسك
[18]
أنا مغلوب على أمرى ورايا جيش ) – ده على أساس انه راجل
الرد : وجعت قلبى يا أخى ! طب اخطبنى الأول يا فالح
[19]
طباعك وحشة مش مناسبانى ) – قليل الذوق
الرد : رضينا بالهم و الهم مش راضى بينا
[20]
أنا نويت أتنسك و اعتكف طول حياتى ) – و حياة سوسو طبعاً
الرد : و ماله يا حبيبى نتجوز و نعتكف مع بعض
[21]
كلام الناس أقوى منّا ) - شكله هيغنى و يلِّم الدبّـان
الرد : كلام الناس لا بيقدم و لا يأخر
اسمع جورج وسوف يا حبيبى و انت تغير رأيك
[22]
لازم الأول أحضر دراسات عليا عشان أبنى مستقبلى ) - اذا ليه مستقبل
الرد : ماشى موافقة نتجوز الأول و احضرهالك كمان لو عايز
[23]
لازم أستنى أخويا الكبير يرتبط الأول ) – شكله مالوش أخ أصلاً
الرد : و ماله أنا أركب دقن أقصد أركب باروكة و اروح أخطبه
[24]
أنا مكتئب مش عايز أكلم حد ولا حد يكلمنى ) – ينفع كومبارس عظيم
الرد : خلاص انتحر يا روحى
[25]
حاسس اننا مش لايقين على بعض ) - جاب التايهة
الرد : فعلاً يا ميدو ايش جاب لجاب
[26]
مش هنقدر نكمل رغم انى عمرى ما هحب غيرك) - ممثل رائع
الرد : ياااا ده انت و لا أروع ممثل ! و ياترى جبتها من أنهو فيلم ؟؟
[27]
استنينى عشرة خمستاشر سنة أكوّن نفسى ) - مستهبل رسمى
الرد : اه و ماله هبقى أستناك أنا و عيالى
[28]
بحبكم انتو الاتنين أعمل ايه؟ ااخد مين؟ ) – متخلف عقلياً
الرد : يشفى الحمير و يضرك ! خدك عزرائيل
[29]
انكسر جوانا شئ عمره ما يتصلح ) – وديه الميكانيكى
الرد : فعلاً كسرت فيا حاجات كتير بس قادرة ألزقها
[30]
خلع من غير ولا كلمة ) - عديم الأصل و واطى أوى
الرد : مفيش- ياللا و لا يهمك الباب يفوت جمل مش صراصير بس
نصيحة لكل شاب منهم
حاول تغطى نفسك قدام نفسك قدام الناس و قدام ربنا .. و ياريت لو يكون الغطا مش مخرم أو مبقع !! و غطينى و صوتى يا ماما
دول كانوا ال 30 حيلة اللى سمعت عنهم لحد دلوقتى ..
طبعاً محدش هيصدق انه الحيل ال30 و ردودهم و التعليقات اللى عليهم من مخى بس هيا دى الحقيقة المرة و انا قلت من الأول انى حابب أرخم!! محدش يخاف منى يا جماعة أنا ما بعضش
كتبت ده ليه ؟؟ .. كتبت الموضوع ده علشان أوصل رسالة أخلاقية تهمس ف ودن كل شاب .. كتبت علشان الحقيقة تفوقنى .. عشان الكلام يواجهنى بانحلال أخلاق البعض و انعدام الدين.. كتبت عشان أطمن إن الدنيا برضه بخير
طلب وحيد لو سمحتوا أى واحد أو اى واحده متعاون يعرف حيلة تانية فياريت يكتبها .. ها يا شباب عرفتوا بقى مين ممكن يضحك على مين ؟؟؟؟؟؟؟؟؟
ومنتظر ردودكم عشان اكمل مواضيعي
